Pasienttilstrøyming til akuttmottak ved to norske universitetssjukehus i 2012–21

Abstract

Bakgrunn

Auking av pasientar til akuttmottaka er ei global utfordring. Vi ønskte å kartleggje pasienttilstrøyming og pasientsamansetning over tid ved to norske universitetssjukehus. Materiale og metode

Retrospektiv, deskriptiv studie av pasientkontaktar (pasientar ≥ 16 år) i akuttmottaka ved Haukeland universitetssjukehus og St. Olavs hospital i perioden 2012–21. Data blei henta frå journal- og pasientadministrative system. Resultat

585 780 pasientkontaktar blei inkludert. Antalet pasientkontaktar i akuttmottak var 30 696 i 2012 og 40 396 i 2021 ved Haukeland universitetssjukehus og 18 967 i 2012 og 28 822 i 2021 ved St. Olavs hospital. Størst prosentvis auke i studieperioden syntest å vere i aldersgruppa 67–79 år med 57 % (frå 6 190 til 9 691) ved Haukeland universitetssjukehus og 77 % (frå 3 849 til 6 817) ved St. Olavs hospital. Andelen pasientkontaktar som enda med innlegging på sjukehus var 82 % i 2012 og 74 % i 2021 ved Haukeland universitetssjukehus og 87 % i 2012 og 61 % i 2021 ved St. Olavs hospital. Av dei som blei lagt inn, var median alder 65 år, medan median alder blant dei som blei utskrevet frå akuttmottaket, var 48 år ved Haukeland universitetssjukehus og 52 år ved St. Olavs hospital. Fortolking

Studien viste ein auke i pasientkontaktar i akuttmottaka ved Haukeland universitetssjukehus og St. Olavs hospital over ti år. Antal eldre i befolkninga vil auke vidare i åra som kjem, og ein kan venta at behovet for «øyeblikkeleg hjelp»-vurderingar vil auke tilsvarande. Det er viktig at helsetenestene har kunnskap om endringar i pasienttilstrøyming og pasientsamansetning for å ivareta pasientsikkerheit og arbeidsmiljø ved akuttmottaka i framtida. Hovudfunn

Talet på pasientkontaktar i akuttmottaka ved Haukeland universitetssjukehus og St. Olavs hospital auka frå 2012 til 2021.

Den prosentvise endringa i antal pasientkontaktar syntest størst for aldersgruppa 67–79 år.

Andelen som førte til innlegging, syntest å gå ned i studieperioden.