Køpris for einkvar pris? Ei studie av avgjerdsprosessen i samband med køprising i Bergen frå perioden januar 2010 til og med mars 2013

Abstract

Køprising bør sjåast i samband med den lokale luftforureininga. Målet med tiltaket er å få bukt med dei trafikale problema som skaper kø og dårleg framkome. Dette skal vidare gje ein miljøgevinst i form av ein mogleg trafikkreduksjon og dermed nedgang i forureinande utslepp. Denne oppgåva tar føre seg avgjerdsprosessen i samband med køprising i Bergen. Dette er eit tiltak som har vorte anbefalt frå ulike hald, både fagleg og politisk. Men Bergen kommune har pr. dags dato ikkje vedteke eller sett i verk eit slikt tiltak. Formålet med studia har vore å nytte ulike avgjerdsmodellar i eit forsøk på å forklare kvifor dette tiltaket ikkje er innført i Bergen. Tidsperspektivet har vore i perioden januar. 2010 til og med mars. 2013. Problemstillinga for studia har vore følgjande: Skildre avgjerdsprosessen i samband med køprising i Bergen, samt forklare denne prosessen opp i mot utfallet. Som eit skildrande rammeverk har eg nytta meg av politikksirkelen (policy cycle) med dei tre første fasane; agendasetjing, politikkformulering og avgjerdstaking. Desse fasane har fungert som ei struktrurering av empirien. Vidare nytta eg tre ulike avgjerdsmodellar; rasjonell modell, administrative man og garbage can modellen, for å peike på moglege forklaringar på utfallet. Studia har vist at den rasjonelle modellen egna seg lite til å forklare ein slik prosess, medan adminstrative man modellen og garbage can utfylte kvarandre godt og forklarte ulike sider ved avgjerdsprosessen. Alt i alt kan det seiast at utfallet er påverka av motstridande interesser, ulike ideologiar og partipoltiske preferansar, samt ein delvis ukoordinert prosess, der konfrontasjonar, mistolkingar og liknande. prega diskusjonen på det tidlege stadiet.