| dc.description.abstract | Hovudmålet med denne oppgåva er å undersøke korleis dokumentarfilm kan bli brukt i klasserommet for å fremje utviklinga av interkulturell kompetansei det obligatoriske faget engelsk på Vg1. Interkulturell kompetanse er viktig i ei globalisert verd. I den overordna delen av læreplanen er det lagt vekt på at det er viktig å ha kunnskap om ulike kulturar fordi opplæringa blant anna skal gi innsikt i kulturelt mangfald og fremje demokrati. I læreplanen for engelsk vg1 er film trekt fram som eit eige mål, etter endringane i 2013, noko som viser relevansen av film som pedagogisk verktøy.
Denne oppgåva ser på korleis elevane opplever bruk av dokumentarfilm i undervisninga. Oppgåva tek utgangspunkt i undervisningsopplegg om ulike tema der fire ulike dokumentarfilmar blir brukt. Elevane sitt arbeid, dokumentarfilmane, ei spørjeundersøking og intervju ligg til grunn for analysen som er både kvantitativ og kvalitativ. Funna blir diskutert i lys av teoriar om interkulturell kompetanse, dokumentarfilmsjangeren og eleven som tilskodar.
Hovudfunna i oppgåva viser at elevane blir engasjerte når dei blir presentert for forteljingar gjennom dokumentarfilm, særskild fordi dei ser at menneska og historiane deira er ekte og sanne. Ein del rapporterer at dei blir kjenslemessig engasjert, noko som indikerer at dokumentarfilmar skaper eit potensiale for utvikling av interkulturell kompetanse. I tillegg viser analysen at fokus på interkulturell kompetanse i engelskundervisninga er viktig, for å fremja kritisk refleksjon i dette arbeidet. | en_US |
