Ny Giv for kven og korleis?: Ein studie av Ny Giv Overgangsprosjektet på ungdomstrinnet og i vidaregåande opplæring.

Abstract

I 2010 lanserte dåverande Kunnskapsminister Kristin Halvorsen Ny Giv – «ein nasjonal dugnad mot fråfall». For første gong blei det rulla ut eit så omfattande tiltak retta mot å få ned fråfallet i vidaregåande skule. Ny Giv skulle involvere både ungdomstrinnet og vidaregåande opplæring, men også NAV og oppfølgingstenesta. Ny Giv føl opp stortingsmeldingar og tidlegare forsking som har påpeika at tidleg innsats mot fråfall bør vere eit satsingsområde. Denne masteroppgåva har hatt som føremål å sjå på Ny Giv i lys av teori om policy design. Overordna problemstilling er todelt: 1. Kva karakteriserer Ny Giv overgangsprosjektet? 2. I kva grad har kontekst hatt noko å seie for Ny Giv overgangsprosjektet. Sentrale spørsmål har vore å finne ut kven som er målgruppa for tiltaket og korleis denne målgruppa blir konstruert, samt å sjå på korleis tiltaket har blitt organisert på skulenivå. Kva skjer når ein set eit så stort prosjekt ut i livet? Vil konteksten «farge» korleis prosjektet blir iverksett og korleis det blir sjåande ut til slutt på den enkelte skule? Kan ein snakke om svake og sterke policy design? Dette er spørsmål som vil bli drøfta mot slutten av oppgåva.