Beredskap tatt av vinden? - Ein casestudie av handteringa av stormen "Dagmar" i Sogn og fjordane

Abstract

I romjula 2011 slo ekstremveret «Dagmar» innover Vestlandet. Stormen råka Norge, Sverige og Finland den 25. og 26. desember. Dagmar var særleg kraftig og gjorde størst skade på Vestlandet. Den største konsekvensen av stormen var det store bortfallet av straum og telekommunikasjon. Problemstillinga for studien er: «Å beskrive og forklare handteringa av «Dagmar- krisa», med ei særleg vekt på utfordringar knytt til fleirnivåstyring, samordning og spesialisering». Masteroppgåva har til hensikt å beskrive og forklare krisehandteringa av stormen «Dagmar» i 2011. Studien er ein kvalitativ casestudie som består av kommunane Eid og Stryn. Kommunane har jamfør prinsippa om samfunnstryggleik i Norge eit stort ansvar knytt til krisehandtering. Datagrunnlaget i studien er basert på kvalitative intervju og kvalitativ dokumentanalyse. Respondentar har vore sentrale personar i kommunane, i tillegg til Fylkesmannsnivået. Sentrale element i studien er utfordringar knytt til fleirnivå, samordning og spesialisering. Studien vil bruke eit instrumentelt og eit institusjonelt perspektiv i den forklarande delen av oppgåva.